Act 11 | MHL | STEP | Aria Yuuda kame-pa wi aposel ne wi Yeesus opora opamik nain feenap miimamik, wi owow oko mua pun Mua Maneka opor eliwa iiriw wiar opamik.

Acts 11

Pita ona uuwowa nain Yerusalem-pa wia maakek

1 Aria Yuuda kame-pa wi aposel ne wi Yeesus opora opamik nain feenap miimamik, wi owow oko mua pun Mua Maneka opor eliwa iiriw wiar opamik. 2 Ne aria Pita Yerusalem ikiwok. Wi Yeesus opora opamik nain mua papako mia kanima puukowa naem-ikemik nain-ke o amukaremi maakemik, “Wi owow oko mua mia kanima me puukimik nain wiamiya ikowa emi, nain no wiamiya ikon ne maa enowa pun wiamiya enem-ikon.”

4 Ne Pita-ke ona iiriw maa kamenap wiar imenarek nain iiwawun wia maakek, 5 “Yo iiriw Yoopa owowa-pa ikok Mua Maneka farem-ikok mokoka-keriw kirep maa feenap urufam. Maa nain konim maneka saarik, nain iinan-pa orok. Kiira erepam-pa neeke opap iinan-pa piipuiwkin orok. Maa nain orop yo mamaiya-pa efar ikua. 6 Yo konima nain baliwep akena mokakem-na maa eneka yiena nepimik nain urufam. Maa eneka asia, ifa ne nepa naap nain pun urufam. 7 Ne iwakara oko naap maeya miimam, ‘Pita, no iikirap maa eneka nain ifakimep enime.’ 8 Naap maeya yos-ke maem, ‘Maneka, weetak akena. Yo maa enowa emi ikua nain me enimiyem.’ 9 Naap maakemkun efa maakek, ‘Maa eneka Mua Maneka-ke emi marew naek nain samora-ke me nae,’ naap maek. 10 Yo maa urufam nain imenarowa arow arep-puami kiiriw iinan urupok. 11 Ne yo naap ikemkun mua wiam arow ekapep koora yo ikem nan efar fuunemik. Mua oko Sisaria-pa ikua nain-ke wia sesekeya yo efa aawowa ekapemik. 12 Ne Mua Maneka Ewar-ke efa maakek, ‘No wi wiamiya ikiwe, kema unu-unowa me wue.’ Ne wi mua wiam ikur okaiwi-pa kuisow yo efamiya ikemik nain pun unowiya Sisaria ikiwemik. Unow onaiya ikiwemi Konilius naimik nain koora wiar fuunemik. 13 Ne os-ke ensel ona koor kemena-pa wiar imenarep maakek nain yia maakek. Ensel nain-ke feenap maakek, ‘No mua-ko wia sesekeya ikiwep mua oko unuma Saimon Pita naimik nain aawep pekapuk. 14 Naeya os-ke Mua Maneka opor eliwa nain nia maakeya ni unow onaiya opora opap o teeria-pa ikowen.’

15 Mua nain-ke naap maeya yo aakunowa onoma wuamkun Mua Maneka Ewar wi wiar orok, iiriw i yiar orok naap. 16 Ne yiena Maneka opora kiiriw kema efar epak. Iiriw naap maek nain, ‘Yon-ke oram eka-pa nia yasuwak, ikoka Ewar Eliwa-ke ni niar oraeya kekanowa aawowen,’ naap maek nain kema suuwam. 17 I Yeesus opora wiar opamkun Mua Maneka Ewar Eliwa yiar orok, naapiw wi wiar orok. Naapeya yo kamenap-ke naeya Mua Maneka maa maek nain wiar fieninen?” Naap wia maakek. 18 Ne wi opora naap wiar miimap kiiriw me amukaremik. Mua Maneka unuma fakerami maemik, “Naap nain Mua Maneka owow oko mua kema kiruk naeya wis pun kema kirep Mua Maneka wameiya ikok eliwa ikaikuan.”

Yeesus opora opamik teeria Antiok-pa imenarek

19 Aria iiriw Stiwen ifakimiwkin umok, iir nain wi Yeesus opora opamik nain wia samo-samoriwkin papako bauraremik. Bauraremi papako Fonisia kame wiar ikiwemik, papako Saiprus mot ne Antiok owowa wiar ikiwemik. Ikiwemi Yeesus opor eliwa wiena Yuuda opor epaskun muutiw wia maakem-ikemik, wi teeria papako wia. 20 Ne wi Saiprus ne Sairini owowa Yeesus opora opamik nain-ke Antiok wiar ikiwep Yeesus opor eliwa wia maakemik, wi Grik opora aakunimik nain. 21 Mua Maneka kekanowa wi wiar ikaeya wia maakiwkin emeria mua unowa kema kirep Yeesus opora wiar opamik. 22 Ne Yerusalem-pa Yeesus opora opamik nain opora nain miimap Banabas sesekiwkin Antiok ikiwok. 23 O ikiwep wia urufak-na Mua Maneka-ke wia asipeya wi Yeesus opora baliwep opamik. Ne kemelami wia maakek, “Ni anane yiena Maneka Yeesus opora wiar ookeka ne opora nain niena kema-pa wuami kakeniw wiar ookeka.” 24 Banabas-na mua eliwa-ke, Mua Maneka Ewar Eliwa wiar ikaeya opora kakeniw wiar opiya. Naapeya Yeesus opora wia maakeya wi teeria maneka Yeesus teeria wiar ekamik.

25 Ne aria Banabas Sol urufekam naep o akupowa Tasus ikiwok. 26 Ikiwep urufap owawiya Antiok owowa ikiwemik. Ikiwep nan mokoma kuisow naap wi Yeesus opora opamik teeria nain wiamiya ikemik. Ne Mua Maneka opora suule baliwep wiem-ikemik. Ne iir nain akena Antiok mua-ke wi Yeesus opora opamik nain “Kristen” wia naemik.

27 Aria iir nain pun wi profet papako Yerusalem piipuap Antiok owowa ikiwemik. 28 Teeria nain mua oko unuma Agabus naimik. Mua Maneka Ewar Eliwa-ke kema iweya iikirami naap maek, “Ikoka weniw maneka miiwa epa unowa feeke imenarinon.” (Nain ikoka Klodius owow saria maneka ikaeya weniwa nain imenarek.) 29 Naap maeya wi Yuudia Yeesus opora opamik nain wia asipu naep onamik. Mua unowa wiena kookalowa-pa wiam kui-kuisow maamuma kuisow kuisow fiirimemik. 30 Naap onap maamuma nain Banabas Sol ikos wiiwkin Yerusalem pikiwep teeria nain woos mua wapena-pa wiar wuamik.